MANILA, Philippines - Isang riot ang naghihintay sa inyo ngayong Sabado (July 28) sa Kapamilya Deal or No Deal dahil haharapin ni comedy concert queen Ai Ai Delas Alas ang tensyon ng pagbubukas ng briefcases at pakikipag-areglo kay Banker.
Bagamat medyo pa-demure at pa-sweet ang beteranang komedyana dahil nasa set ang kanyang special someone para suportahan siya ay hindi pa rin napigilang maaliw at mapatawa niya ang studio audience sa kanyang mga hirit.
Sa bandang huli ng laro ay lalamunin na nga si Ai Ai ng tensyon lalo pa’t papalapit na siya ng papalapit sa P2 milyong jackpot.
Siya na kaya ang pinakaunang milyonaryo para sa edisyong ito? Suwertehin kaya siya sa laro lalo pa’t nariyan ang lalaking nagsisilbing inspirasyon niya sa ngayon? Makuha kaya ni Ai Ai o ni Banker ang huling halakhak?
Huwag palalampasin ang Kapamilya Deal or No Deal ngayong Sabado (July 28), pagkatapos ng TV Patrol Weekend sa ABS-CBN.