Sa ikatulong higayon, subling gilangkatan sa Lumad Basakanon ang titulo ug gibulsa ang one million pesos nga premyo gikan sa bag-o pa lamang nahuman nga Aliwan Festival sa Manila.
Ang Lumad Basakanon maoy pambato sa dakbayan sa Sugbu sa maong indigay nga giisip nga “mother of all festivals” sanglit tanang rehiyon sa nasud ang mopadala og contingent aron makigtigi. Mas hugyaw ang sitwasyon karong tuiga para sa Lumad Basakanon tungod kay gikasangka nila ang contingent sa Carmen, Cebu—opisyal nga contingent sa lalawigan sa Sugbu—ug nahimong third placer sa maong festival. Kahinumduman nga ang Carmen maoy nahimong second placer sa miaging Sinulog grand parade. Si Cebu City Mayor Tomas Osmeña dihang nahinabi sa Banat Hugyaw, mipadayag sa iyang dakong kalipay human iyang nasayran nga nahimong mananaog ang delegado sa Sugbu batok sa ubang contingents nga nanimpad sukad niadtong Mayo 1 hangtod na sa 3. Ang Lumad Basakanon sa Barangay Basak San Nicolas maoy nahimong mananaog niadtong 2006 ug 2007, ug nahimong grand prize winner sa Sinulog free interpretation category. “No one else won it before – for three consecutive years. I am very happy for them and they deserve the congratulations from us,” nagkanayon si Osmeña. Ang kagamhanan sa syudad sa Sugbo migahin og dul-an usa ka milyon ka pesos aron pag-abag sa Lumad Basakanon sa ilang pagkaon ug transportasyon alang sa 130 dancers, 40 instrumentalist ug 30 ka propsmen. Matud pa ni Osmeña, dili lalim para sa Lumad Basakanon nga modepensa sa ilang titulo tungod kay daghan ang nangahas nga mga contingents nga mikopya sa ilang costume ug steps sa ilang pagsayaw. “Everybody seems to copy their costumes. The biggest opponent they are facing is themselves,”dugang ni Osmeña.
Nasayran sa Banat Hugyaw nga wala mitambong si Basak San Nicolas Barangay Captain George Rama tungod kay gikuyawan kung unsa’y madangatan sa iyang contingent. Si Konsehal Rodrigo Abellanosa lamang ang opisyal nga mitambong, kauban sa kadagkoan sa Sinulog Foundation nga sila si Ricky Ballesteros ug Dolly Suzarra.