Hapit na lang maghubo ang maanyag nga Hollywood actress/model nga si Maggie Q isip labing bag-ong endorser sa People for the Ethical Treatment of Animals (PETA) Asia-Pacific campaign. Duha ka hulagway ang gimugna alang ni Maggie-sexy bikini nga gigama sa lettuce leaves ug dunay tagline “Turn Over a New Leaf – Try Vegetarian!” ug ang ikaduha mao ang hubo niya nga lawas nga gitabunan lamang og crimson chili peppers.
Ang maong mga hulagway gitumong sa pagpakatap sa mensahe ang pagka-vegetarian o pagkaon og utanon maoy labing maayo nga pamaagi aron mas magmadasigon ang imong kinabuhi, pagbaton og baskog nga lawas, ingon man pagpanalipod sa hayupan ug kalikupan.
Sulod sa dugay na nga katuigan isip vegetarian, si Maggie nagkanayon nga ang iyang pag-undang og kaon og karne maoy labing maayo nga hukom nga iyang nabuhat.
“I feel better, I have more energy on and off the set, and I have the satisfaction of knowing that I’m doing something to help stop animal suffering.”
Si Maggie Q bag-ohay lamang nakita kauban si Tom Cruise sa pelikulang “Mission Impossible III.” Asiano ang kaliwat ni Maggie, apan nahimugso siya sa Honolulu Hawaii, hinungdan nga American ang iyang citizenship.