PILI, Camarines Sur, Philippines — Patay agad ang isang lasing na lalaki matapos resbakan at tagain sa leeg ng 70-anyos na lolo na kanyang sinuntok sa Zone-1, Brgy. Palestina ng bayang ito, kamakalawa ng hapon.
Hindi na nagawang dalhin pa sa pagamutan na agarang nasawi dahil sa malalim na taga sa leeg ang biktima na kinilalang si Erickson Guyala Brito, 44-anyos, may-asawa, habang sumuko naman sa mga rumespondeng pulis ang suspek na si Salvador Antang Barcebal, binata, pawang residente ng naturang barangay. Isinuko rin nito ang itak na ginamit sa pananaga.
Sa ulat, dakong alas-3:30 ng hapon, dumating umano sa lugar ang lasing na biktima at sa hindi malamang dahilan ay bigla nitong binigwasan ng suntok ang matanda dahilan para magkaroon sila ng mainit na pagtatalo.
Sa galit ng matanda, binunot nito ang itak sa kanyang beywang at tinaga sa leeg ang biktima na agarang nasawi.