ABUCAY, Bataan, Philippines — Arestado ang isang lalaki sa kasong robbery extortion sa ikinasang entrapment operation ng mga otoridad sa Barangay Gabon ng bayang ito, kamakalawa ng umaga.
Ayon sa pulisya, kinilala ang suspek na si Reynald De Jesus na nahaharap din umano sa kasong paglabag sa Section 35 ng Republic Act 10591.
Tinatakot at kinikikilan umano ng malaking halaga ng suspek ang mag-asawang sina Rodolfo at Janice na taga-Abucay, Bataan dahilan upang kanilang hingin na ang tulong ng mga otoridad at ikinasa ang entrapment operation.
Mabilis na inaresto ang suspek nang tanggapin umano nito ang boodle money na P50,000 sa napagkasunduang lugar at oras.
Nakuha sa pag-iingat ng suspek ang isang replica na baril, Toyota Hi Ace van at ang marked money na ginamit sa operasyon.
Nasa kostudiya na ng pulisya ang suspek para sa kaukulang disposisyon.