Klase sa Region 11 at 12, suspendido pa rin dahil sa lindol – NDRRMC

MANILA, Philippines — Inihayag ng National Disaster Risk Reduction and Management Council (NDRRMC) na nananatiling kanselado ang pasok sa eskuwela sa ilang paaralan sa Region 11 at 12 na naapektuhan ng Magnitude 6.8 na lindol na tumama sa Davao Occidental noong Biyernes.

Kabilang sa mga suspendidong pasok ay isang paaralan sa Digos Davao del Sur mula pre-school hanggang tertiary level.

Province wide naman ang suspension ng klase mula pre-school hanggang tertiary sa Davao Occidental, Sarangani at South Cotabato.

Batay sa datos ng NDRRMC, ang ilang paaralan ay patuloy na sumasailalim sa Engineering Assessment para mabatid kung ligtas pang gamitin habang ang iba naman ay kailangang sumailalim sa pagkukumpuni.

Anang NDRRMC, kailangan na masuri kahit ang maliliit na bitak para na rin sa kaligtasan ng lahat.

Samantala, nananatili sa 9 katao ang iniwang patay ng lindol at 16 ang sugatan habang umakyat sa 3,696 pamilya o katumbas ng 16,293 na indibidwal mula sa 51 barangay sa Region 11 at 12 ang naapektuhan ng lindol.