CAVITE, Philippines — Pinagbabaril hanggang mapatay ng ‘di nakilalang salarin ang isang mister habang sakay ng motorsiklo galing sa sabungan kamakalawa ng gabi sa Brgy. Magdiwang, bayan ng Noveleta, dito.
Kinilala ang biktima na si Oscar Asuncion, Jr., ng Brgy. San Juan 2, Gen. Trias City, Cavite habang mabilis namang tumakas ang salarin matapos nitong mapatay ang biktima.
Sa ulat ng pulisya, alas-9:15 ng gabi habang pauwi na galing sa Noveleta Cockpit Arena at bumabagtas sa nasabing lugar ang biktima lulan ng kanyang motorsiklo nang dikitan ng suspek na sakay ng kulay itim na Yamaha Mio at agad na pinagbabaril.
Nang masigurong napuruhan ang biktima, humarurot papatakas ang suspek patungong Kawit area.
Nagsasagawa pa ng follow-up operation at investigation ang pulisya hinggil sa posibleng motibo sa naganap na ambush.