4 terorista, sundalo todas sa Lanao encounter!
COTABATO CITY - Apat na miyembro ng teroristang grupong Dawlah Islamiya at isang sundalo ang patay matapos ang umaatikabong engkwentro nitong Huwebes ng umaga sa Marogong, Lanao del Sur.
Ayon kay Brig. Gen. Allan Nobleza, director ng Police Regional Office-Bangsamoro Autonomous Region, inaalam pa ng mga imbestigador at local officials kung sino ang apat na terorista na nasawi ng kanilang nakasagupa ang mga Army Scout Rangers na nagpapatrolya sa Barangay Piangologan sa bayan ng Marogong.
Kinumpirma rin ni Nobleza na isang sundalo na nakilalang si Pfc. Jemric Pol Contingo, ang nasawi sa palitan ng mga putok sanhi ng tama ng bala sa ulo.
Apat na kasama ni Contingo, sina Cpl. Cronel Ducrao, Cpl. Regi Macahilig at Pfc. Noel Notario, ang sugatan sa engkuwentrong naganap.
Ang insidente ay kasunod ng banta ng Dawlah Islamiya nito lang nakalipas na linggo na lulusubin nila ang sentro ng Marogong kung hindi palalayain ng pulisya ang kanilang mga miyembro na naaresto sa mga serye ng police operations sa Lanao del Sur ng nakalipas na ilang buwan.
Marami sa mga nakulong na mga myembro ng Dawlah Islamiya ay naaresto dahil sa pagkakasangkot sa mga krimen katulad ng multiple murder at pagnanakaw ng mga alagang kalabaw at baka ng mga magsasaka.
Ilan naman sa kanila ay nalambat sa mga anti-shabu entrapment operations.
- Latest