MANILA, Philippines — Nasamsam ng anti-narcotics agents ang nasa 208 gramo ng methamphetamine hydrochloride o shabu na nagkakahalaga ng P1.4 milyon mula sa tatlong hinihinalang drug trafficker sa Aparri, Cagayan nitong Huwebes.
Ayon sa ulat, nakumpiska ng mga operatiba ng Philippine Drug Enforcement Agency ang nasabing droga mula sa mga suspek na sina Rolando Uri, 52; Mila Malana, 50, at Michael Uri, 37, na pawang nadakip sa Barangay Maura dakong alas-5 ng umaga.
Naaresto ang tatlong suspek sa isinagawang pagsalakay sa kanilang bahay ng mga ahente ng PDEA at mga pulis na armado ng search warrants na inisyu ng korte sa Aparri.
Bukod sa shabu, nasa 90 gramo pa ng marijuana na nagkakahalaga ng P10,000 at .38 kalibreng baril ang narekober mula sa mga suspek.