GENERAL TINIO, Nueva Ecija, Philippines — Inaresto ng pulisya ang apat na binata matapos maaktuhang nagpa-pot session o bumabatak ng illegal na droga sa isang bahay sa Barangay Concepcion ng bayang ito, kahapon ng madaling-araw.
Kinilala ang mga natiklong suspek na sina Red De Guzman, 20; Arnel Ditucalan, 41, kapwa helper; Mark Robie Busuego, 18, isang vendor, pawang mga residente ng Brgy. Concepcion, dito; at si Roman Angelo Dayao, 22, walang trabaho ng Brgy. Padolina, Gen. Tinio, Nueva Ecija.
Ayon sa pulisya, agad silang rumesponde sa tawag ng isang concerned citizen ukol sa nagaganap na paggamit ng ilegal na droga ng apat na suspek na kalauna’y naaresto at nasa kustodya ngayon ng Gen. Tinio Municipal Police.
Dakong ala-1:30 ng madaling araw ng Martes nang salakayin ng mga pulis ang Ditucalan residence at naabutan ang apat na suspek sa kainitan umano ng kanilang paghitit ng hinihinalang shabu.
Nakumpsika sa mga suspek ang 3-piraso ng plastic sachet ng umano’y shabu, isang plastic sachet ng umano’y pinatuyong dahon ng marijuana, isang aluminum foil strip, isang aluminum improvised toother, 2 lighter at isang aluminum roll foil.
Sinaksihan ang paghuli sa mga suspek ng elected barangay officials ng nasabing barangay at media representative.