5 mangingisda nilamon ng karagatan
MERCEDES, Camarines Norte, Philippines — Malawakan ang ginagawang search and rescue operation ng mga tauhan ng Mercedes MDRRMO katuwang ang Philippine Coastguard sa malawak na karagatan ng Pacific Ocean matapos na hindi makauwi ang limang mga mangingisda na pumalaot at inabutan ng bagyong Karding noong Linggo ng umaga.
Kinilala ang mga nawawalang mangingisda na sina Rodel Quiñones Carullo, 37-anyos, may asawa; Ricky Ignacio Nuñez, 40-anyos; Roger Zamora Pun-an, 59-anyos; Gerome Pun-an Plopenio, 19-anyos at Efren Lozada Jr., 42-anyos, pawang residente ng Purok-3, Brgy. San Roque, Mercedes, Camarines Norte.
Sa ulat ng Camp Gen. Simeon Ola, alas-5:00 ng umaga sa gitna ng masamang panahon ay pumalaot upang mangisda lulan ng motorized banca na “FB NO NAME”, na pag-aari ni Cristina Gallora Evangelista sina Pun-an, Plopenio at Lozada.
Dakong alas-7:00 naman ng umaga ay sunod na pumalaot gamit ang bangkang pangisda na may pangalan din na “FB NO NAME” na pag-aari naman ni Efren Era Evangelista sakay sina Carullo at Nuñez.
Gayunman, hanggang kahapon na sinusulat ang balita ay hindi pa nakakauwi ang limang biktima at hindi na rin matagpuan ang kanilang mga bangka matapos abutan ng malakas na bagyo sa gitna ng karagatan.
- Latest