SILANG, Cavite, Philippines — Kapwa patay ang dalawang rider habang kritikal ang kanilang mga angkas nang makabanggaan nila ang isang Ford Explorer sa kahabaan ng kalsada na sakop ng Brgy. Poblacion 2, kamakalawa ng gabi.
Ang dalawang nasawi ay kinilalang sina Faulo E. Wales, 28, factory worker; at Troy Jamil T. Moreno, binata, garbage collector.
Kritikal sa pagamutan ang mga backrider nilang sina Ramoniel B. Wales, asawa ni Faulo; at John Mico T. Moreno, 22, backrider ni Moreno, pawang mga residente ng Silang,Cavite.
Nasa kustodiya na ng pulisya ang driver ng Ford Explorer na nakilalang si Jaime H. Aldaba, 60, may-asawa.
Sa imbestigasyon ng pulisya, bago naganap ang insidente, alas-7:30 ng gabi ay kapwa binabagtas ng 2 motorsiklo ang nasabing kalsada nang makasalubong ang SUV na minamaneho ni Aldaba dahilan upang magsalpukan.
Tumilapon ang mga sakay ng dalawang motorsiklo at bago pa sila madala sa pagamutan ay binawian na ng buhay si Wales, namatay din habang ginagamot si Moreno.