SAN NARCISO, Quezon, Philippines — Nagmistulang kinatay na hayop ang isang magsasaka makaraang pagtatagain nang kanyang hinamon ng away sa Sitio Centro, Barangay Aurin sa bayang ito, kamakalawa ng umaga.
Kinilala ng pulisya ang biktima na si Efren Aureada, 40, may asawa at residente ng Barangay Pagkakaisa habang naaresto naman ang suspek na si Ryan Saunar, 45, residente ng nasabi ring lugar.
Lumalabas sa imbestigasyon na bandang alas-7:30 ng umaga habang nag-aalmusal ang suspek sa loob ng kanilang bahay ay nakarinig siya ng sigaw mula sa labas.
Nang dumungaw sa bintana ang suspek ay nakita niya ang biktima na lasing na hinahamon siya ng away kaya kumuha siya ng itak sa kusina at lumabas.
Agad na tinaga ng suspek ang naghahamon na biktima sa katawan na bagama’t sugatan ay nagawang tumakbo. Gayunman, hinabol pa rin ng suspek at nang abutan ay pinagtataga sa ulo at leeg hanggang tuluyang malagutan ng hininga.
Inaalam pa ng pulisya ang ugat ng hindi pagkakaunawaan ng dalawa.