MORONG, Bataan, Philippines — Natagpuan ng mangingisda ang katawan ng isang lalaki na wala nang buhay at palutang-lutang sa karagatang sakop ng Morong at Bagac ng lalawigang ito kahapon ng umaga.
Patuloy na inaalam pa ang pagkakakilanlan ng biktima na nakasuot ng kulay asul na damit at maong shorts.
Sa ulat ni Police Executive Master Sergeant Abdulbaser Guialalodin, may hawak ng kaso, natagpuan ng mangingisdang si Marcial Gajudo bandang alas-6 ng umaga ang bangkay, may ilang milya ang layo mula sa pampang ng Morong at Bagac kung kaya’t mabilis nitong ipinagbigay-alam sa mga awtoridad ang insidente.
Kaagad namang nagtungo ang mga tauhan ng Morong Monitoring Team at Olongapo Maritime Police Station gamit ang kanilang Police Rubber Boat 04 (PRB04) na kaagad nagsagawa ng retrieval operations.