MANILA, Philippines — Kapwa nasawi ang mag-asawa nang sila ay malasog matapos mabundol at makaladkad ng pampasaherong bus nitong Miyerkules sa Maguindanao.
Kinilala ang mag-asawa na sina Gurry Kalugay, at Zalika Gudal-Kalugay, kapwa residente ng Barangay Tual, Paglat, Maguindanao.
Ayon kay Maguindanao Police Provincial Director Colonel Christopher Panapan, hapon ng Miyerkules naganap ang insidente sa tulay ng Barangay Poblacion Buluan Maguindanao.
Lumabas sa imbestigasyon ng pulisya, minamaneho ni Gurry ang motorsiklo angkas ang kanyang misis nang bigla na lamang silang mabangga ng kasalubong na Yellow bus liner.
Sa lakas ng pagkakasalpok, tumilapon ang mag-asawa sa kalsada at pumailalim sa bus saka nakaladkad.
Nagtamo ng matinding pinsala ang ulo at katawan ng mag-asawa na naging sanhi ng kanilang kamatayan.
Ang suspek na driver ng bus ay mahaharap sa kasong reckless imprudence resulting to multiple homicide at damage to property.