MANILA, Philippines — Nalaglag sa kamay ng pulisya ang isang big-time drug pusher na kabilang sa listahan ng mga high value individuals (HVIs) sa isinagawang buy-bust operation ng Philippine Drug Enforcement Agency (PDEA) at Cavite Police kamakalawa ng gabi sa Brgy. Salawag, lungsod ng Dasmariñas.
Kinilala ng pulisya ang suspek na si Alnor Haron Macarampat, nasa hustong gulang, residente ng Brgy. Salawag, Dasmariñas City.
Sa nakalap na ulat mula kay P/Cpl. Wilfredo Villanueva Jr., dakong alas-10:20 ng gabi nang magkasa ng buy-bust operation ang pinagsanib na puwersa ng Police Drug Enforcement Unit (DEU), Cavite Provincial Police Office, Station Drug Enforcement Unit at Dasmariñas City kung saan target ang suspek sa Batangay Scalawag.
Bago isagawa ang buy-bust, nabatid na ilang araw nang isinailalim sa surveillance ang suspek na kilalang bigtime drug pusher sa nasabing lugar.
Nang magkaabutan ng droga at marked money, agad na dinakip ang suspek at narekober sa kanya ang tatlong plastic na naglalaman ng mga shabu na aabot sa mahigit 300 gramo at may halagang P2,070,000 at mga perang ginamit sa operasyon. - Mer Layson