LABO, Camarines Norte, Philippines — Karumal-dumal na kamatayan ang sinapit ng isang 43-anyos na magsasaka matapos pagtatagain ng kanyang nakatatandang kapatid makaraang mag-away sa lupa sa Purok-3, Brgy. Malatap ng bayang ito kamakalawa ng gabi.
Naliligo sa sariling dugo at patay na nang abutan ng mga rumespondeng pulis ang biktimang si Christopher Non Avila, dahil sa malalalim na taga sa iba’t ibang bahagi ng katawan.
Arestado naman ang suspek na si Allan, 47-anyos, kapwa may-asawa, magsasaka at residente ng naturang lugar.
Sa ulat, alas-7:30 ng gabi dahil sa iringan sa lupang sinasaka ay nagkaroon ng komprontasyon ang magkapatid na nauwi sa suntukan hanggang sa nakakuha ang suspek ng itak at pinagtataga ang nakababatang kapatid na agad nasawi.