CAVITE, Philippines — Patay ang isang motorcycle rider nang suyurin ng kasalubong na kotse matapos umanong makatulog ang driver nito sa kahabaan ng Tagaytay-Nasugbu Hway, Brgy. Buck Estate, bayan ng Alfonso, dito kahapon ng umaga.
Kinilala ng pulisya ang nasawi na si Arnold Caluya, 36-anyos, may asawa na nagtamo ng matinding pinsala sa katawan habang wasak na wasak ang minamaneho nitong motorsiklo.
Nasa kritikal namang kondisyon sa ospital ang driver ng kotse na nakabangga sa biktima na si Jean Paolo Tenorio, 29.
Sa imbestigasyon ni P/Cpl. Deverson Salinas, alas-9:30 ng umaga habang sakay ang biktima ng Suzuki MC red, 2013 model, plate NC58201 at bumabagtas sa kahabaan ng Tagaytay-Nasugbu Highway sa Brgy. Buck Estate nang salpukin ng kasalubong na Geely Coolray SX11G.S, conduction T0H264 na minamaneho ni Tenorio at may kabilisan umano pareho ang takbo ng mga ito.
Sa lakas ng impact, wasak na wasak ang motorsiklo at napuruhan ang driver nito habang dumirteso sa kanal ang naturang kotse.