SANTIAGO CITY, Isabela, Philippines — Tatlong mga kalalakihan na pawang mga wanted dahil sa kasong panggagahasa ang dinakip ng mga awtoridad sa magkakahiwalay na lugar.
Kinilala ni P/Col. Andree Abella, information chief ng Police Regional Office 2 (PRO2) ang mga nadakip na sina Jerry Damasco, 54, top 7 most wanted provincial level at residente ng Barangay Bangag, Aparri, Cagayan; Ignacio Hidalgo, 63, ng Barangay Gomez, Cabarroguis, Quirino at Santos Lawek, 26, ng Barangay Cabaruan, Maddela, Quirino.
Si Hidalgo ay top 8 most wanted habang si Lawek ay top 9 sa Quirino.
Ayon kay Abella, ang pagkadakip ng mga akusado ay isinagawa ng mga operatiba ng pulisya sa bisa ng warrant of arrest na ipinalabas ng korte dahil sa kasong rape.
Nasa kustodiya na rin ng pulisya ang tatlong mga akusado at nakatakdang dalhin sa court of origin.