DIADI, Nueva Vizcaya, Philippines — Tatlong katao ang nasugatan habang isang tindahan at isang bahay ang tuluyang nilamon ng apoy matapos magsalpukan ang dalawang trak na lumikha ng malaking sunog sa national highway ng Brgy. Nagsabaran sa bayang ito noong Huwebes ng madaling-araw.
Nilapatan ng lunas sa ospital ang mga nasugatan na nakilalang sina Wilfredo Faustino, 66, ng Malolos, Bulacan; Walter Taguinod, 44, ng Tuguegarao City, Cagayan, kapwa driver at helper na si Christopher Flores, 42.
Ayon sa ulat, binabagtas ng dalawang trailer truck na minamaneho nina Faustino at Taguinod ang magkasalungat na bahagi ng pangunahing kalsada nang magsalpukan ang mga ito sa palikong bahagi ng daan.
Sa lakas ng banggaan, nagliyab ang mga sasakyan at nadamay ang isang bahay at tindahan sa gilid ng highway na pag-aari naman ng isang Delmar Garcia na ikinasugat ng tatlong biktima.
Bagama’t umaambon, tumagal ng mahigit isang oras ang sunog na nagdulot ng mahabang trapiko sa magkabilang linya ng kalsada bago tuluyang naapula ng mga rumespondeng bumbero ang apoy.