MANILA, Philippines — Karumal-dumal ang sinapit ng isang bulag na ama sa kamay mismo ng kanyang sariling anak na pinagsabihan nitong umiwas sa pag-inom ng alak matapos siyang pagsasaksakin sa loob ng kanilang tahanan noong Miyerkules ng hapon sa Davao del Sur.
Sa naantalang ulat ng pulisya, kinilala ang biktima na si Dalyana Lingi, 37-anyos, residente ng Prk 6, Sitio Datalpitak, Brgy. Colonsabac, Matanao ng nasabing lalawigan na dead-on the-spot sa insidente.
Kalaboso naman ang suspek at anak ng biktima na si Clifford, 19-anyos, residente sa nasabi ring lugar.
Lumilitaw na pinagsabihan ng ama ang anak sa laging paglalasing nito pero ikinagalit ng huli kaya kumuha ng kutsilyo at pinagsasaksak ang walang kalaban-laban na amang bulag.
Labis naman ang pagsisisi ng suspek na nakapiit sa Matanao Municipal Police Station at handang harapin ang kasong parricide na isinampa laban sa kanya.