SAN LEONARDO, Nueva Ecija, Philippines — Dalawang hinihinalang tulak ng droga ang nasakote sa P160,000 halaga ng pinatuyong dahon ng marijuana sa isang buy-bust operation sa Barangay Diversion dito, kamakalawa.
Kinilala ni P/Col. Jaime Santos, Nueva Ecija Police provincial director, ang mga naarestong suspek na sina Garry Nagaño, 33, drayber ng Barangay Bagong Silang, Talavera, Nueva Ecija; at Alex Benigno, 30, ng Tuao, Cagayan na kasalukuyang naninirahan sa Science City of Muñoz.
Sinabi ni Santos na ang operasyon laban sa dalawa ay isinagawa bandang alas-11:00 ng umaga ng mga elemento ng San Leonardo municipal police station sa pakikipagkoordinasyon sa Philippine Drug Enforcement Agency (PDEA) at nasa 2.97 kilo ng pinatuyong dahon ng marijuana ang nakuha sa mga suspek na tinatayang aabot sa halagang P160,000.