Bumaril at nakapatay sa 16-anyos
MANILA, Philippines — Kasong homicide ang isinampa laban sa 10 miyembro ng Laguna Provincial Police Office (PPO) na sinasabing nakabaril at nakapatay sa isang 16-anyos na binatilyo sa isinagawang anti-drug operation sa Biñan City, Laguna nitong nakalipas na buwan, Hunyo.
Ayon kay Police Regional Office 4A chief Police Brigadier General Eliseo Cruz, naisampa na ng Fact Finding Investigation Task Group ang kaso sa City Prosecutor’s Office ng Biñan City kamakalawa laban sa 10 tauhan ng Laguna PPO Provincial Intelligence Branch kabilang na ang hepe nito na si Police Captain Fernando Credo.
Ang kaso ay batay sa complaint affidavit ng ina ng napatay na menor-de-edad na si Johndy Helis.
Matatandaang Hunyo 16 nang magsagawa ng pagsalakay ang nasabing mga pulis bitbit ang warrant of arrest laban sa kanilang target na si Antonio Dalit pero nanlaban umano ang huli at ang binatilyong si Helis kaya sila napatay.
Gayunman, nanindigan ang pamilya ni Helis na hindi makakapanlaban ang binatilyo dahil nakaposas ang mga kamay nito nang hulihin ng mga pulis.
Ayon naman sa pamilya ni Dalit, hindi totoo na may dala itong baril. Ang ipinakitang baril ng mga pulis ay isang Airsoft gun.