TIGBAO, Zamboanga del Sur, Philippines — Patay ang dalawang kasapi ng New People’s Army (NPA) nang makaengkuwentro ang tropa ng pamahalaan habang isa ang naaresto sa Barangay Guinlin sa bayang ito, kahapon ng umaga.
Kinilala ang mga nasawi na sina Felimon Suazo, a.k.a. Jonathan Cruz/Nathan at James Cordero, a.k.a. James/Tito habang naaresto naman si Elvie Doctor, a.k.a. Bangkat/Nanang.
Sa ulat mula kay WestMinCom Commander Lt. Gen. Corleto Vinluan, Jr., nagsagawa ng joint law enforcement operation ang tropa ng 53rd Infantry Battalion at Tigbao Municipal Police Station ng kanilang makasagupa ang anim na mga NPA alas-5:00 ng madaling araw.
Papalapit pa lamang ang tropa ng pamahalaan sa lokasiyon ng kalaban nang sila ay paputukan ng mga NPA hanggang sa nagkabakbakan na nagresulta sa pagkasawi ng dalawang rebelde.
Napag-alaman na si Suazo ay miyembro ng executive committee ng Western Mindanao Regional Party Committee, Political Instructor (PI)/Finance at miyembro ng squad 1 of the defunct Main Regional Guerilla Unit.
Narekober ng tropa ng pamahalaan ang isang M16 attached with M203 Grenade Launcher, isang 9mm pistol, isang cal. 45 pistol, apat na 40mm ammunition, four magazines ng M16 loaded with 75 rounds of ammunition at mga NPA propaganda materials.