MANILA, Philippines — Isang municipal councilor ng bayan ng Sudipen at angkas nito ang kapwa patay matapos bumangga sa isang steel post signage ang kanilang motorsiklo sa national highway sa Brgy. Bias, Bangar, La Union kamakalawa ng gabi.
Kinilala ang mga biktima na sina Sangguniang Bayan Member Edwin Belisoa, Jr., 25, at Ronald Lipurada, 26, kapwa residente ng Brgy. Ilocano, Sudipen, La Union.
Base sa imbestigasyon ng Bangar Police, pauwi na ang mga biktima dakong alas-8 ng gabi sakay ng motorsiklo nang mawalan ng kontrol sa manibela si Belisoa at bumangga sa isang steel post signage.
Dahil sa lakas ng pagkakasalpok, tumilapon ang mga biktima sa daan.
Ang dalawa ay agad na isinugod sa Balaoan District Hospital matapos ang insidente pero idineklarang dead-on-arrival si Lipurada habang binawian ng buhay habang ginagamot si Belisoa.