CATAINGAN, Masbate, Philippines — Kapwa bulagta ang dalawang ice cream vendor matapos pagbabarilin ng mga armadong lalaki sa kahabaan ng highway ng Brgy. Cagbatang, Cataingan ng lalawigang ito kamakalawa ng hapon.
Dead-on-the-spot dahil sa mga tama ng bala sa katawan ang mga biktima na kinilalang sina Jhone Conchas Andaya, may asawa ng Brgy. Usab, at Jaymark Cioco Amador, may asawa ng Brgy. Nursery; pawang sa Masbate City.
Sa ulat, dakong alas-5 ng hapon, kapwa nagmamaneho ng kanilang tricycle ang dalawang biktima at magkasunod nilang binabagtas ang highway mula sa Brgy. Lihong patungong Brgy. Poblacion para magtinda ng ice cream nang pagdating sa nasabing lugar ay hinarang sila ng mga armadong lalaki at walang kaabog-abog na pinagbabaril.
Nakuha sa lugar ang walong basyo ng M16 armalite rifle at 9 na basyo ng bala ng kalibre 9mm na baril.