CAVITE, Philippines — Dahil sa umano’y matinding pagkapikon, pinagbabaril hanggang sa mapatay ng isang retired Navy officer ang kanyang kapitbahay na mister na dati na nitong kaalitan sa Brgy. Marahan 1, bayan ng Alfonso, dito kahapon ng umaga.
Hindi na umabot pang buhay sa pagamutan ang biktimang si Ireneo Alumno, may asawa, 49- anyos, habang hawak na ng pulisya ang suspek na si Florante Flores, may asawa; pawang residente sa nasabing lugar.
Sa imbestigasyon ng pulisya, alas-7:30 ng umaga nang magkaroon umano ng pagtatalo ang magkapitbahay nang magpanagpo hanggang sa maungkat ang dati nilang alitan. Nauwi sa mainitan at maaanghang na sagutan ng dalawa hanggang sa mapikon ang suspek kaya binunot ang dalang baril at sunud-sunod na pinaputukan ang kapitbahay.
Agad na rumesponde ang mga pulis at naaresto ang suspek.