BURDEOS, Quezon , Philippines — Isang 73-anyos na biyuda ang agaw-buhay makaraang pagtatagain ng sariling anak dahil lamang sa tubig kamakalawa ng umaga sa Barangay Calutcot ng bayang ito.
Kinilala ng pulisya ang biktima na si Ligaya Delos Santos, habang naaresto naman ang anak niyang si Randy, 38, binata.
Ayon sa ulat, bandang alas-5:00 ng umaga ay inutusan ng biktima ang kanyang anak na palamigin ang pinainit niyang tubig subalit nagalit ang huli at nakipagtalo pa sa ina.
Sa gitna ng pagtatalo ay kumuha ng gulok ang suspek at pinagtataga sa likurang bahagi ng ulo ang ina.
Bagama’t sinisigawan na ang suspek ng kanilang mga kapitbahay ay patuloy ito sa pananaga sa ina hanggang sa pagbabatuhin na siya at nang mabitiwan ang gulok ay pinagtulungang dalhin sa presinto habang ang biktima ay mabilis na isinugod sa Polilio Medicare Clinic.