TUGUEGARAO CITY, Cagayan, Philippines — Isa ang nasawi habang tatlo pa ang kritikal nang mahulog ang isang SUV sa may 160 metrong bangin sa bulubunduking highway ng KM 57 Cattubo, Atok, Benguet kahapon.
Kinilala ng pulisya ang nasawi na si Jaquelin Mayos, 31, habang inoobserbahan sa hindi natukoy na ospital sina Joe Mayos na pinaniniwalaang kabiyak ng nasawi, Leticia Avelino at drayber na si Johnlo Gayudan; pawang mga residente ng Lam-ayan, Buguias, Benguet.
Sa inisyal na imbestigasyon, lumalabas na nag-overtake sa kurbadang bahagi ng matarik na daan ang drayber ng sinakyang Toyota Fortuner ng mga biktima nang mawalan ito ng kontrol at mahulog sa bangin dakong alas-7:00 ng umaga.
Naging pahirapan sa mga emergency responders ang pag-ahon sa mga biktima habang wasak ang SUV dahil sa lalim ng lugar na kinabagsakan.