MANILA, Philippines — Hindi na umabot ng Bagong Taon ang isang 63-anyos na lolo makaraang mabangga ng isang rumaragasang motorsiklo habang nagbibisikleta sa kahabaan ng Maria Clara L. Lobregat Highway, Brgy. Quiniput, Zamboanga City nitong Martes ng gabi.
Kinilala ang nasawi na si Celerio Mangila ng Sitio Ontong, Brgy. Quiniput, Zamboanga City habang nahaharap sa kasong reckless imprudence resulting in homicide ang naarestong rider na si John Mark Rebollos, 24, ng Brgy. Quiniput ng lungsod.
Sa ulat ng Police Regional Office (PRO) 9, alas-8:30 ng gabi habang nagbibisikleta ang biktima nang matumbok ng motorsiklong Honda RS 150 ni Rebollos.
Sa lakas ng pagkakabangga, tumilapon ang matanda at idineklarang patay sa Zamboanga Medical Center.