MALOLOS CITY, Bulacan, Philippines — Inihatid ni Agriculture Sec. William Dar ang sertipiko ng tulong pinansyal para sa binhi at pataba na nagkakahalaga ng P175,923,000 sa lalawigan ng Bulacan sa isinagawang Rapid Damage Assessment on Agriculture and Fisheries na dulot ng bagyong Ulysses sa Balagtas Hall, Hiyas ng Bulacan Convention Center sa lungsod na ito.
Ito ay matapos personal na bisitahin ni Dar ang mga apektadong bukirin partikular na sa Pulilan-Baliwag Bypass Road kasama sina Bulacan Gov. Daniel Fernando, DA Asec. Noel Reyes, DA Regional Director Crispulo Bautista, RFO-III, Mayor Maria Rosario Ochoa-Montejo, Panlalawigang Agrikulturista Ma. Gloria Carrillo, mga agrikulturista ng mga bayan at pinuno ng mga magsasaka.
“We are giving the province this assistance pero posible pa itong madagdagan depende sa magiging resulta ng assessment sa mga susunod na araw. Aside from this, may ayuda rin tayo, maagang Pamaskong handog na P5,000 cash sa lahat ng rice farmers na nagsasaka ng isang ektarya pababa, gayundin sa mga non-rice farmers, ito ‘yung mga nagtatanim ng mais, niyog, tubo at mga mangingisda mula sa Bayanihan 2,” pahayag ni Dar.
Sinabi rin ng kalihim sa mga magsasaka na maaari pa rin silang mangutang ng halagang P25,000 na walang tubo at pwedeng bayarang sa loob ng 10 taon.
Mula sa inisyal na pagtataya, ibinahagi ni Fernando na sa kasalukuyan, bagaman at apektado ng bagyong Ulysses ang lahat ng bayan at lungsod sa lalawigan, ang mga bukirin sa una at ikalawang distrito ang pinakanasalanta.
Samantala, ibinalita ni Bureau of Fisheries and Aquatic Resources (BFAR) Regional Director Wilfredo Cruz, RO-III na sa Rehiyon III na tinatayang nasa 7,500 metric tons ng bangus na nagkakahalaga ng P600 milyon ang nasalanta habang halagang P100 milyong bangus fingerlings ang namatay dahil sa pananalasa ng bagyo.