CAVITE, Philippines — Patay ang isang binatang rider matapos malapitang barilin ng isang contractor na nabundol nito habang naglalakad kamakalawa ng gabi sa Gemelina St., Brgy. Mambog 3, Bacoor City.
Hindi na umabot pang buhay sa ospital ang biktimang si Anthony Ryan Bartolome, 38-anyos, isang sales staff at residente ng B7 L7 Gemelina St., Addas 4B Mambog 3, Bacoor City bunga ng tama ng bala sa katawan.
Agad namang naaresto ng mga opisyal ng barangay ang suspek na si Robert Domingo Gonzaga Espanto, 53, may asawa at residente ng B5 L2, Mahogany St., Addas 4B Village, Mambog 3, Bacoor City.
Sa imbestigasyon ni P/SSgt. Alih Rimbang, dakong alas-7 ng gabi habang binabagtas ng biktima ang nasabing lugar lulan ng kanyang motorsiklo nang aksidente nitong masagi ang suspek na naglalakad patawid sana sa kabilang lane ng kalsada.
Nagalit ang suspek at kinompronta ang biktima na agad namang nagpaliwanag pero lalong nag-init at hindi nagustuhan ito ng suspek hanggang sa bumunot ng baril at harapang pinaputukan ang una.