P50 na taya pinagtalunan
TUGUEGARAO CITY, Cagayan , Philippines — Isang 48-anyos na mister ang patay habang malubha ang anak nito matapos silang pagsasaksakin ng kanilang nakaalitan sa sugal na “dice” sa gitna ng pinaiiral na health protocol ngayong panahon ng pandemya sa Ilagan City, Isabela noong Biyernes.
Sa report ng pulisya, namatay habang ginagamot sa isang pribadong ospital sa Cauayan City si Manuel Manaligod habang inoobserbahan ang anak na si Maxwell, 20-anyos na kapwa binurdahan ng saksak ng kapitbahay nilang si Ruben Eugenio.
Lumalabas sa imbestigasyon na nagtalo ang matandang Manaligod at si Eugenio dahil sa tayang P50 na nauwi sa suntukan. Nagtangka namang umawat ang nakababatang Manaligod pero siya naman ang pinagbalingan pagsasaksakin ni Eugenio na diumano’y lango sa alak.
Agad namang nadakma ng mga nagrespondeng pulis si Eugenio na sinampahan na ng kasong kriminal.