CAVITE, Philippines — Arestado ang mag-live in partner matapos na masamsaman ng droga, baril at granada sa isinagawang buy-bust operation ng pulisya kamakalawa ng gabi sa Brgy. Sampaloc 4, Dasmariñas City.
Ang mga suspek na kapwa nahaharap sa mga kasong paglabag sa R.A. 9165, R.A. 10591 at R.A. 9516 ay nakilalang sina Jeffrey Tabiando, 29, at ang kinakasama nitong si Gieanne Andoque, 20- anyos, kapwa residente ng nasabing lugar.
Sa ulat, alas-8 ng gabi nang ikasa ng mga operatiba ng Dasmariñas Police-Drug Enforcement Unit (DEU) at ilang ahente ng Philippine Drug Enforcement Agency (PDEA) ang buy-bust laban sa suspek na si Tabiando na target ng operasyon.
Nang magkaabutan na umano ng droga at buy-bust money, agad na dinampot ang suspek at kinakasamang si Andoque na nasa lugar.
Nakuha sa magdyowa ang limang plastic sachet ng shabu , isang granada at isang caliber 38 revolver na kargado ng mga bala, at drug money. Ayon sa pulisya, posibleng miyembro si Tabiando ng sindikato ng robbery holdup at carnapping.