MANILA, Philippines — Mariing kinondena ni Kabacan Mayor Herlo Guzman Jr. ang naganap na walang habas na pamamaril sa kanyang teritoryo ng ‘di kilalang grupo matapos umakyat na sa 9 ang nasawi kahapon.
Nilinaw ni Guzman na walang naganap na engkuwentro sa pagitan ng mga pulis, sundalo at ng mga biktima at lumalabas na kagagawan ito ng ‘di pa kilalang armadong grupo.
Pinara umano ng mga suspek ang mga biktima at hiningian pa ng mga ID bago pinagbabaril.
Isa naman ang rido o clan war sa mga anggulong tinututukan ng pulisya sa ngayon na sanhi ng krimen.
Unang naiulat na walo ang nasawi sa insidente subalit kinumpirma ni Kabacan chief of police Major Peter Pinalgan Jr. na tuluyan nang binawian ng buhay ang isa pang biktima sa pamamaril na si Tong Guiman ng Brgy. Aringay.
Ang 9 na biktima na lulan ng mga motorsiklo ay pinagbabaril sa Provincial Road sa tabi ng USM Compound, Kabacan, Cotabato, nitong Sabado ng alas-12:10 ng tanghali.