LEGAZPI CITY, Albay, Philippines — Kapwa nalasog ang katawan ng dalawang rider matapos na magbanggaan ang kanilang minamanehong motorsiklo sa kahabaan ng highway sa Brgy. Sto.Domingo sa bayan ng Calabanga, Camarines Sur, kamakalawa ng gabi.
Kinilala ang mga nasawi na sina Rodolfo Modilla Ortiz, 44, ng Brgy. San Lucas at Elison Salire Cometa, 35, ng Brgy. Dominorog.
Sa ulat, alas-11:25 ng gabi kapwa mabilis at magkasalubong na binabaybay ng Honda motorcycle ni Ortiz at Euro motorcycle (parehong walang plaka) ni Cometa ang highway nang aksidenteng magbanggaan sila sa gitna.
Sa lakas nang banggaan sugatang tumilapon ang dalawang rider at parehong nawasak ang kanilang minamanehong motorsiklo.
Agad na isinugod ang dalawa sa Bicol Medical Center sa Naga City pero hindi na umabot nang buhay si Ortiz habang nasawi naman habang ginagamot si Cometa.