Tserman sa Cavite itinumba ng tandem!
Matapos sibakin ang mag-amang baragay staff
CAVITE, Philippines — Patay ang isang barangay chairman dito matapos na pagbabarilin ng riding-in-tandem habang nakatayo sa tapat ng kanyang bahay sa Brgy. Daang Amaya 1, bayan ng Tanza kamakalawa ng hapon.
Kinilala ang nasawi na si Emilio Mercado, nasa hustong gulang at aktibong tserman sa nasabing barangay.
Sa pagsisiyasat ng pulisya, nagkaroon umano ng away sa pagitan ng nasabing tserman at sina Greg Crudo, dating chief tanod na tinanggal nito sa pwesto at anak na si Reymark Crudo, dating barangay secretary ng biktima. Nakaalitan din umano ng kapitan ang isa pang opisyal ng barangay na si Myron Ner na first kagawad nito.
Noong Mayo 30, 2020, naghain ang kapitan ng reklamong “threat and unjust vexation” laban kina Greg Crudo at Ner na sinisilip na motibo sa pamamaslang.
Alas-4 ng hapon kamakalawa habang nakatayo ang biktima sa tapat ng bahay nito nang bigla siyang tapatan ng isang kulay pulang Yamaha Nmax na hindi nakuha ang plaka at pinagbabaril ng dalawang suspek na magkaangkas bago mabilis na tumakas.
Nangangalap na ng kopya ng CCTV ang pulisya sa pinangyarihan ng insidente.
- Latest