TUGUEGARAO CITY MANILA, Philippines — Arestado ang 73 Chinese nationals at tatlong Pilipinong kasabwat matapos mabuwag ng mga awtoridad ang illegal na operasyon ng POGO (Philippine Offshore Gaming Operator) sa ginawang pagsalakay sa loob ng Villa Saturnina Hotel and Resort sa Brgy. Rapuli, Santa Ana, Cagayan noong Martes.
Sinabi sa PSN ni Cagayan Police director Col. Ariel Quilang na tinutugis pa nila ang pinuno ng pasugalan na si Frank Yu na nasa lalawigan lamang.
Kasamang nadakip ng 73 Tsino na walang maipakitang dokumento at pasaporte ang mga Pinoy na sina Erwin Digol, Alexis Isaac Ferro at Mylene Tuazon.
Ayon sa report, isinagawa ang paglusob sa illegal POGO operation dakong alas-9:30 ng gabi matapos magpalabas ng search warrant si Judge Nicanor Pascual Jr. ng Aparri Regional Trial Court. — Victor Martin
Ayon kay Quilang, walang pahintulot sa Cagayan Economic Zone Authority (CEZA) ang naturang POGO operation. Nasamsam sa lugar ang 103 laptop at desktop computers at mga wifi gadgets.
Sinabi ni Major Joefersson Gannaban ng Cagayan Police Office na inaalam nila sa Bureau of Immigration ang estado ng pananatili ng mga nahuling Tsino sa bansa.