Kelot na nakipag-eyeball sa textmate, natagpuang patay
MAUBAN,Quezon, Philippines — Naaagnas na nang matagpuan kamakalawa ang isang binatang may anim na araw nang nawawala na hinihinalang pinaslang nang kinatagpuang textmate sa Barangay Daungan.
Ang biktima na si Erickson Paralleon, 30, ng Brgy. Lual ay kinilala ng kanyang ama sa suot nitong wrist watch at tattoo sa kaliwang bahagi ng kamay.
Ayon Kay PLt. Benito Nevera, Deputy chief of police dito, nakatanggap sila ng ulat mula sa mga opisyal ng barangay tungkol sa mabahong amoy na nagmumula sa kakahuyan.
Nang tuntunin ng pulisya ang pinagmumulan ng masangsang na amoy ay natagpuan nila dakong alas-10:30 ng umaga sa irrigation canal ang naaagnas na katawan ng isang lalaki.
Nakita rin malapit sa pinagtagpuan ng bangkay ang isang motorsiklo na hinihinalang pag-aari ng biktima na may anim na araw nang nakatengga doon.
Kinumpirma ni Rafael Paralleon, ama ng biktima na sa kanyang anak ang motorsiklo at ang long sleeve at reflectorized vest na nakita sa loob ng tool box ng sasakyan.
Bago umano nawala ang biktima noong July 8,2020 ay nakita itong abala sa pagte-text sa isang hindi pa kilalang textmate.
Inaalam pa ng pulisya ang dahilan ng pagkamatay nito at kung sino ang salarin.
- Latest