Baragay kagawad, tanod dinukot ng NPA

LEGAZPI CITY, Albay, Philippines — Hindi pa natatagpuan ang isang barangay kagawad at tanod matapos na pasukin sa kanilang bahay at kaladkarin ng hinihinalang mga rebeldeng New Peoples Army (NPA) patungo sa bulubunduking lugar ng Brgy. Mapili, Balud, Masbate kamakalawa ng gabi.

Patuloy na pinaghahanap ang mga biktima na kinilalang sina Noli Dela Cruz, 51-anyos, kagawad ng Brgy, Mapili at kamag-anak na si Marlon Dela Cruz Bajar, 25-anyos, tanod ng nasabi ring barangay.

Sa ulat, dakong alas-11 ng gabi sa hindi malamang dahilan ay pinasok ng pitong armadong kasapi ng NPA ang bahay ng natutulog na sina Dela Cruz at kinaladkad palabas.

Sumunod na sinugod ng mga armadong rebelde ang bahay ni Bajar at sapilitan siyang inilabas at kasama na ang kaanak na kagawad na sapilitang dinala paakyat sa bundok.

Hindi pa malaman kung buhay o pinaslang na ng mga suspek ang dalawang biktima habang patuloy na umaasa ang mga kamag-anak nila na sila ay buhay pa.