CALAUAG, Quezon, Philippines — Patay agad ang pahinante ng isang dump truck makaraang makabanggaan ng kanyang sinasakyan ang kasalubong na tractor head truck na ikinasugat ng dalawang driver sa Maharlika Highway na sakop ng Barangay Sto. Domingo ng bayang ito kamakalawa ng umaga. Ang biktima na nagtamo ng grabeng pinsala sa ulo at katawan ay kinilalang si Mark Benedick Alvarez, 30, binata at residente ng San Miguel Bulacan. Ginagamot naman sa Magsaysay District Hospital sa Lopez, Quezon ang mga driver na sina Reynaldo Salvador, 24, ng San Miguel Bulacan at Lito Mahilum ng Taguig City. Sa imbestigasyon, patungo sa Metro Manila dakong alas-7:00 ng umaga ang tractor truck (BUF-850) ni Mahilum nang tumbukin ng dump truck (AGA-7001) ni Salvador matapos na mawalan ng kontrol sa manibela ang huli. Sa lakas ng banggaan, kapwa nawasak ang unahang bahagi ng dalawang trak na ikinaipit at agad ikinamatay ng biktimang pahinante.