NORTH COTABATO, Philippines - Nasawi ang dalawang lalaki na Indian-looking nang sumalpok ang kanilang sinasakyan sa nakaparadang multicab sa highway ng Purok Dos sa Brgy. Katipunan, Arakan, lalawigang ito kahapon ng tanghali.
Patuloy na inaalam ng pusliya ang pagkakilanlan ng dalawang biktima na agad nasawi sa insidente at isang batang nasugatan.
Sa inisyal na ulat, dakong alas-12 ng tanghali habang nakahinto lamang sa tabi ng kalsada ang multicab nang salpukin ng sasakyan ng mga Indian-looking national na may plakang VJJ 711.
Pinaniniwalaang nagkaaberya ang sinasakyan ng dalawang biktima kaya sumalpok ito sa multicab. Nagkayupi-yupi ang sasakyan ng mga biktima.
Mabilis namang sumaklolo ang mga tauhan ng Call 911 ng lungsod ng Davao na mas malapit sa pinangyarihan ng aksidente. Nailigtas naman ang isang bata na naipit sa nasabing sasakyan. Agad na inialis sa pagkakaipit ang mga biktima at isinugod sa pinakamalapit na ospital ang mga sugatan.