TAWI-TAWI, Philippines — Umaabot sa P11.3-milyong halaga ng smuggled fuel ang nasamsam ng pinagsanib na elemento ng Philippine Air Force (PAF) Special Mission Group, Naval Intelligence Security Unit at Marine Corps matapos maharang ang isang barko sa karagatan ng Brgy. Pakias, Bongao, Tawi-Tawi kamakalawa ng gabi.
Ayon kay PAF Chief Spokesman Major Aristedes Galang Jr., dakong alas-10 ng gabi nang maharang ang M/L Arnalyn 2 vessel sa bisinidad ng nasabing karagatan.Kasalukuyang nagpapatrolya ang Field Station Western Mindanao (Intelligence Unit) PAF Special Mission Group katuwang ang Naval Intelligence Security Unit 61; Tactical Operations Group Sultaw; S2 Marine Battalion Landing Team 9 at 8 Marine Company Marine Corps Assault Boat Battalion nang masabat ang nasabing barko na naglalaman ng mga puslit na langis.
Agad na ininspeksyon ng security forces ang nasabing barko at dito tumambad ang 500 drum ng mga smuggled fuel products.
Wala namang maipakitang dokumento ang mga tripulante ng barko na nagsasaad na legal ang pagbibiyahe ng nasabing mga produktong langis na agad kinumpiska ng mga operatiba. Arestado sa operasyon ang anim na tripulante habang nasa kustodya ng Bongao Pier ang nasabat na barko.