MANILA, Philippines — Patay ang isang opisyal ng Commission on Audit (COA) ng Maguindanao nang ratratin ng ‘di pa natutukoy na riding-in-tandem habang papauwi sa kanilang tahanan kasama ang mister na sakay sa kanilang sasakyan na naganap sa likod ng isang mall sa Brgy. Rosario Heights 7 sa Cotabato City kahapon ng tanghali.
Ang nasawing biktima ay si Guiaria Bagundang Akmad, 60-an-yos, provincial auditor ng Maguindanao; habang ligtas naman ang kanyang mister na si Hadji ali Akmad.
Agad namang tumakas ang mga suspek sa ‘di nabatid na direksyon.
Sa salaysay ng mister ng biktima, galing sila sa opisina ng kanyang misis sa compound ng Bangsamoro Autonomous Region in Muslim Mindanao at pauwi na sa kanilang bahay, nang biglang sumulpot ang mga salarin at tinabihan ang kanilang sasakyan at saka pinagbabaril ang biktima pasado alas-11 ng tanghali.
Nakuha pa umanong bumunot ng baril si Hadji at hinabol ng putok ang mga suspek pero may isa pang magkaangkas sa motorsiklo ang nasa kanilang likuran at sila’y pinaputukan.
Nabatid na 9 na taong nanungkulan ang biktima bilang provincial auditor ng COA-Maguindanao.