CAGAYAN, Philippines— Isang pulis ang nasa kritikal na kondisyon nang magkabali-bali ang mga buto matapos sumemplang ang motorsiklong gamit sa isinagawang pagsasanay sa Brgy. Libag Sur, Tuguegarao City, Cagayan kamakalawa.
Sa report na nakarating kay Lt. Colonel George Cablarda, hepe ng Tuguegarao City Police Station, bahagi ng training si Master Sergeant Ian Jay Malana, 36-anyos, ang magpatakbo nang matulin sa pabulusok at kurbadang daan sakay ng motorsiklo bilang kasapi ng Provincial Mobile Force Company sa lalawigan ng Cagayan.
Gayunman, nawalan sa kontrol sa handle bar ang pulis dahilan upang sumirko ito sa ere at lumagapak nang malakas sa lupa.
Hindi na nakatayo pa ang biktima na isinugod ng ambulansiya sa Cagayan Valley Medical Center kung saan siya inoobserbahan.