TUGUEGARAO CITY, Cagayan, Philippines — Isang 63-anyos na lolong treasure hunter ang nalibing nang buhay matapos bumigay ang hinuhukay nilang basang lupa sa paghahanap ng umano’y gold bars na bahagi ng Yamashita treasure sa Brgy. Centro sa bayan ng Dinapigue, Isabela noong Huwebes.
Kinilala ng Dinapigue Police ang nasawi na si Benedicto Paulino, tubong Bongabon, Nueva Ecija.
Ayon sa ulat, mag-isa lamang sa loob ng limang metrong hukay ang matanda nang bumigay dakong tang-hali ang gawing itaas na butas dahil sa mga sunud-sunod na pag-ulan.
Nabatid na sa sikretong panig ng kagubatan malapit sa baybay dagat isinagawa ng grupo ng biktima ang paghahanap ng ginto na pinamunuan ni Edgar Salvador na tubong Tacloban, Leyte at sinasabing pinamanahan ng kanyang lolong gerilya ng treasure map.
Sumuko naman sa mga otoridad si Salvador na natakot kuyugin ng mga kaanak ng matanda.
Nahukay naman ng mga tumulong na mamamayan ang bangkay ng biktima at ibiniyahe sa isang punerarya sa Dilasag, Aurora.