SANTIAGO CITY, Isabela, Philippines — Isang minero ang nasawi habang dalawang kasamahan nito ang kritikal matapos na sumalpok ang kanilang sinasakyang motorsiklo na kulong-kulong sa isang konkretong poste sa kahabaan ng highway sa Brgy. Bagahabag, Solano, Nueva Vizcaya, kamakalawa ng gabi.
Kinilala ang nasawi na si Joey Habbiling ng Brgy. Runruno, Quezon habang inoobserbahan sa ospital sina John Paul Bumanghat at Eric Tomas, 36, pawang ng Brgy. Runruno, Quezon.
Sa ulat, galing ang mga biktima sa Solano at patungo sana sa Quezon sakay ng kulong-kulong na minamaneho ni Tomas dakong alas11:55 ng gabi nang bigla umanong mawalan ng kontrol sa manibela ang huli pagsapit nila sa pakurbadang bahagi ng daan sanhi para sumalpok sila sa isang konkretong poste sa gilid ng highway.
Dahil dito, tumilapon si Habbiling mula sa kulong-kolong at tumama ang ulo nito sa sementadong kalsada na kanyang ikinamatay. Napag-alaman na nakainom umano ng alak ang mga biktima at mabilis ang patakbo ng driver nang maganap ang insidente.