TUGUEGARAO CITY, Cagayan, Philippines –Dalawang estudyante ng Technical Education Skills and Development Authority (TESDA) ang patay matapos salpukin ng kanilang motorsiklo ang concrete barrier ng tulay sa Barangay Magsaysay, Naguilian, Isabela noong Lunes.
Kinilala ni P/Captain Maryrose Sibbaluca ng Naguilian Police ang mga nasawi na sina Malbert Balimbin, 26-anyos at Vicente Esmela, 21, kapwa nag-aaral sa TESDA-Ilagan City, Isabela. Ayon kay Sibbaluca, kapwa lango sa alak ang dalawa matapos na manggaling sa isang inuman sa kapistahan ng Barangay Minallo nang pinaharurot ni Balimbin ang dalang motorsiklo habang angkas si Esmela.
Pabalik na sila sa kanilang paaralan nang sumalpok ang motorsiklo sa konkretong harang sa tulay pagsapit sa nasabing lugar dakong alas-2:50 ng hapon. Kapwa dead-on-the-spot ang mga biktima sa insidente.