Sa pagpatay kay Dra. Rumohr
CALBAYOG CITY, Samar, Philippines – Nag alok na kahapon ng P3 milyong pabuya ang pamilya ng dentista at negosyanteng si Dra. Vicky Rumohr na pinaslang noong Abril ng mga hindi pa nakikilalang riding-in-tandem suspects.
Sa kabuuang pabuya, P1 milyon ay para sa makapagbibigay ng mahalagang impormasyon, samantalang tig-isang milyong piso naman ang ibibigay sa mismong triggerman at sakay nito kapalit ng pagbunyag nila kung sino ang nag-utos sa kanila na patayin ang dentista.
Sa press conference sa Calbayog City, hindi pa rin tinutukoy ng anak ni Dra. Rumohr na si Kathleen Rumohr Hugo Valestra ang posibleng motibo sa pagpatay ngunit sinabing hindi sila naniniwala na ito’y may kinalaman sa pulitika. Si Kathleen ay humarap sa mga miyembro ng media kasama ang kanyang kapatid na si Dino, mga pinsan na sina Ignacio at Maricris Rumohr at National Coordinator ng Volunteers Against Crime and Corruption (VACC) na si Rosita Roque.
Matatandaang bandang alas-4 ng hapon noong April 15, 2019 nang barilin si Dr. Vicky Rumohr, 69-anyos, ng riding-in-tandem habang nagmamaneho ng kanyang pick-up truck sa kahabaan ng Magsaysay Blvd. Extension, habang papunta sa kanyang tanggapan sa Narcisa Hills Subdivision. Siya ay dead-on-the-spot matapos magtamo ng tama ng bala sa pisngi na tumagos sa kanyang batok.
Sa mga may impormasyon na makakatulong para malutas ang kaso ni Dra. Rumohr, maaaring tumawag sa nasabing pamilya sa 0915-3961096 o sa VACC sa 0998-9902337.