Colonel, tauhan malubha sa ambush
MANILA, Philippines — Dalawang pulis ang nasugatan makaraang tambangan ng mga bandidong Abu Sayyaf Group (ASG) sa liblib na lugar sa Brgy. Igasan, Patikul, Sulu nitong Lunes ng umaga.
Kinilala ang mga biktima na sina P/Colonel Angelo Canapi at Patrolman Nijar Awwalon; pawang miyembro ng 2nd Provincial Mobile Force Company (PMFC) ng Sulu Police Provincial Office.
Si Canapi ay nagtamo ng tama ng bala sa kanang braso habang nasa kritikal namang kondisyon si Awwalon na tinamaan ng bala sa ulo.
Sinabi ni PNP Spokesman Brig Gen. Bernard Banac, dakong alas -7:45 ng umaga, kasalukuyang nagsasagawa ng route security ang mga biktima para sa mga car-pooled na guro ng Department of Education (DepEd) na nakatalaga sa silangang bahagi ng Sulu nang mangyari ang insidente. Bigla na lamang pinaulanan ng bala ng mga armadong bandido ang mga pulis pagsapit nila sa nasabing lugar.
Ang mga biktima ay mabilis na isinugod sa Integrated Provincial Health Office (IPHO) bago inilipat sa Trauma Ward ng Kuta Heneral Teodulfo Bautista (KHTB) Station Hospital sa Brgy. Busbus, Jolo.
- Latest